يالعاليه بسألك هـو وش علامـه
يومه تغير بـدل الوصـل بفـراق
انا الذي سقت القدم فـي مرامـه
وكتبت فيه من الشعر كل مـالاق
لجله رخص من كان عالي مقامـه
ولجله نسينا احباب وقلوب عشـاق
مااخطيت في حقه وبين خصامـه
وانا الذي بالوصل لـه دوم سبـاق
عليه منـي كبرهـا مـن ملامـه
يومه يصد ويودع القلـب يشتـاق
اذكر ولاانسى جملة فـي كلامـه
يومه يقول احذر ترى الوقت بواق
ياخذك مني لحظـة فـي ظلامـه
ودونك ترى ذا الكون ياكيف ينطاق
نسى عهود الحب وارسل سهامـه
والحب موقف والوفا سيد الاخلاق
لايحسبني برخـي اليـوم هامـه
هامة شرف ماتخضع الا لخـلاق
ولايحسبنـي برتجيـه ابتسـامـه
ولايحسبني بزعـج الدمـع دفـاق
يبطي ترى ماشاف دمـع الندامـه
يبطي ولو الكون من سبته ضـاق
لو هان قلبـي ماتهـون الكرامـه
ماهينها لو يمـي المـوت ينسـاق
قله ترى المجد لـي فـي سنامـه
مجلس ومنزال مثل شمس الاشراق
العز في يمنـاي ماسـك خطامـه
والطيب مثل الغيـث لالاح بـراق
وبكره عليه الوقت لحكم احزامـه
يصبر عليه ويحتمل مـر مـاذاق
ماينفعه ذا الوقت عضـة ابهامـه
ولاينفعه ذكر الليالـي والاشـواق
يالعاليـه اقـري عليـه السلامـه
انكفت عن حبـه ولانـي بتـواق
ابيـه يفهـم جملتـي بحتـرامـه
ماهوب انا اللـي للمقفيـن لحـاق
النمط المتتابع
