السلام عليكم ورحمة الله وبركاته

مساءٌ جميل وصباحٌ جديد وعيدٌ سعيد للجميع..


مقدمه

بينما كنت غارقا حد الثمالةِ بين الاوراق واتنقل بين امهات الكتب وبطون الشعر ومعلقاته فاذا بعيني تقع على ماخطه المتنبي ذات مساء فقال ..


عيدٌ باي حال عدت ياعيدُ ××× بما مضى ام بامر فيك تجديد


صح لسانك يابو متنبي ولايهون السامعين والسامعات .. واذا بالتعزيز ياتي مباشره من شاعر الخديوي الاول علي الدرويش فقال ..


عوائد العيد أفراح وإيناس ×××وعادة الصدر تهوى شرحه الناس

عيد سعيد كسته سين سالفه ××× مورَّذات حكاها الورد والآس

هذا هلال بأفق العيد يشرق أم ××× محرابه رمضان فيه نبراس


وفي موضع آخر اتى منصور الشادي برائعته ..


اهلا اهلا بالعيد مرحب مرحب بالعيد هيه هيه هيه العيد فرحه ياسلام واجمل فرحه ياسلام ...


وبينما انا على هذا الحال من التعمق والانهماك الفكري فاضت قريحتي الشعريه فجدُت بما جال بخاطري وألهب أكُفي فقلت..


أتحرى العيد أكثر من بَزِر ××× وأتعذر فيه لأجل اولع طرطعان

وأسرق البسطات في عز الظُهر××× منها استانس واولع طرطعان




مدخل


كل عام والجميع بخير وصحه وسلامه وعافيه .. الله يجعلكم جميعا ممن كتب لهم ان يكونوا من عتقاؤه في شهره الفضيل اعاده الله علينا وعلى المسلمين اعوام عديده وازمنة مديده ..

محدثكم رفع الله قدره وشكم قلبه أتى لكي يبربس معكم ويخنبق عليكم شوي بمناسبة العيد السعيد واعذرونا على قل الكلافه .. عيدكم سعيد وعساكم من عواده .. واللي يبي عيديتيه يراجعنا عقب مانستلم .. بالمناسبه انتظروا بقية القصيده في ديواني الشعري القادم ..



عيدٌ باي حال عدت ياعيد!!


ايييييييييييييييه ياعيد أول ومان اول .. كانت هذه زفرة عميقة مصحوبة بحكة دقن من ابو ناصر وهو يرتشف ماتبقى من قهوه في قعر الفنجان..

ويأتي صوت ام ناصر مقاطعا تسلسل أفكار ابو عيالها .. أزيدك يبو ناصر؟

ابو ناصر بعد ماسفه ام ناصر دقايق تحدت متحسراً .. تذكرين ايام اول وحنا ندور بالديره بين البيوت ونقول .." خير لفانا ولفاكم, شر تعدانا وتعداكم, زور ابن الزرزور اللي عمره ماكذب ولاحلف زور .... "

قطع حديث ابو ناصر صوت رنين الهاتف..

ابو ناصر: الو من معي؟

أتى صوت ابنه ناصر.. وبعد السلام والسؤال عن الحال ..

ناصر: يبه كل عام وانتم بخير وعيدكم مباركم .. بكره العيد الله يحفظك..

ابو ناصر: شلون يابوك؟! تونا قاضين من صلاة المغرب وبعد ماأعلنوا؟!

ناصر: طال عمرك ولدي سعد جاته رساله من جوال الهلال بالخبر .. وأزيدك من الشعر بيت جوال النصر مرسلين لبخيت من عقب صلاة العصر ..

ابو ناصر: زين زين .. وهو يتحلطم ويكمل تحسفه على الايام الخوالي ..


ناصر بعد ان نشر الخبر لكل الاقارب والاصدقاء .. يالله ياسعد انت وبخيت قوموا نبي نزور جدودكم نباركلهم بالعيد .. وانتم بعد يامنيفه ومنيره تجهزوا ويا أميمتكم بناخذكم معنا عقب صلاة العشاء..

سعد: لا يبه انا مواعد اخوياي نبي نروح نلعب بلياردو ونتزلج في فال (طيييب ) ..

بخيت: وانا بعد يبه عندي دوري بلايستيشن وبعد اليوم الحلقه الاخيره من المسلسل وماابيها تفوتني ..

ناصر: اييييييييييييييييييييييييه يازمان اول ( نفس ديباجة ابوه) .. عيال هاليومين مافيهم خير .. بس يابنيات تجهزوا مانبي نتأخر ..

ام ناصر: لا لا حنا نبي نروح للسوق نكمل باقي أغراض العيد باقي ملابس رابع يوم العيد! وانا ان شاء الله بتصل على اهلي واهلك واعايدهم وبكره نشوفهم!


عيدنا وعيدهم .. في اعتقادي أن هناك شبه اتفاق ان العيد في السابق أجمل وله قيمه أكبر وايضا نتفق ان لكل زمن جيله واهتماماته .. لكن يبقى السؤال ..

ليه كل ابو دايم الكبير يحكم الصغير ويكسر مجاديفه؟!

مثلا يجيك ابو ناصر ويقول وييين عيد زمان أول وعيد هالأيام .. ويجيك الجيل اللي عقبه وتلقى ناصر ويقلل من قيمة العيد وفرحته عن العيد على ايامه .. حتى بين الاطفال تلقى بخيت مستانس وفرحان بالعيديه اللي جمعها ويجيه اخوه الاكبر سعد ويستبثر عليه ويقول .. يوم اني قدك كنت اجمع فلوس اكثر منك !!



رؤية الهلال


ذات مساء أطلق شاعر الهلاليين بيتا يوازي قصيده كامله فقال ..

اذا لعب الهلال فخبروني ×× فان الفن منبعه الهلالِ


لا احد ينقزلي ويجيني يقول.. لا عاد تكثر فول على الفطور ومن هالحكي الماصل لاني بقوله بارك الله فيك قريحتي الشعريه عقب مافاضت طفحت ونزل علي الالهام فقلت..

اذا انحاس التقويم فلا تخبروني ×× فان الدربكه منبعها الزعاقي <=== هذا حق الفلك اللي مشغلنا في الجرايد


عاد يقولون ان زرقاء اليمامه طقتها الغيره من الزعاقي بارك الله فيه .. بس قالت الشرهه عليهم لان العدسات ايام اول مافيه الا زرقاء ولا حمراء او خضراء اليمامه ماهو بشين ..

أمنيه تراودني وان شاء الله تتحق بحياتي ويجي اليوم اللي اشوف فيه تقويم ام القرى معتمد كما هو!


وبغض النظر عن رؤية الزعاقي واختلافه مع علماء الفلك ومدى صحة اياً منهم ..ألم يحن الوقت لاستخدام التقنيه الحديثه المتوفره لقطع الشك باليقين وتدعيمها بقول فاصل من هيئة كبار العلماء؟!




أتحرى العيد أكثر من بزر!!


قلت في مطلع معلقتي العصماء .. اتحرى العيد اكثر من بزر ×× وأتعذر فيه لأجل اسرق طرطعان ... الى اخر المعلقه,,

والحقيقه ان هالقصيده لها مناسبه خاصه !

انا علمتكم ببعض عياييري وهي.. القوي .. والقوي مره .. والشجاع.. والصنديد المغوار.. واليوم ابعلمكم بعيارتي اللي ازعل منها وهي الطرطعان!

والطرطعان هذي لها قصه معي.. وانا صغير كنت الولد القوي مثل اكة السبيت وقبضاي الحاره وانا الآمر الناهي..
مافيه مباراه تصير الا باذني ومافي بزر ياكل حلاو الا ونصها لي ومافي احد يستفزع الا بي ..

وفي مره واحد من البزارين جاب معه شروخه وصواريخ .. المهم واخذها منه واقول مايولعها غيري..وارص البزارين صف واحد واجيك انا يالقوي واقولهم بولعها وهي بيدي..والبزران يصايحون ويصفرون ماهم مصدقين .. اللي يقول هذا اقوى واحد بالدنيا واللي يقول هذا صديقي انا ..ومادريت الا والشروخه بيدي شابه بس المشكله اني نسيت اني اول مره اولع شروخه ومااعرفلها .. المهم وتفقع الشروخه بيدي وانحرق . .
واجيك اطامر مع الحريق وادس يدي بالتراب كود انها تبرد وانا اصيييييييح اصييييح اصييح والبزران قاموا يضحكون علي وانا اللي تطقني العزه بالاثم واحط حرتي فيهم وطرطعت (يعني عصبت ) عليهم واولع باقي الشروخات وانطلها عليهم .. وهم يصايحون تكفى لاتطرطع علينا لا تطرطع علينا .. ومن عقبها عيارتي الطرطعان ..


السؤال هنا .. هل انتم مع الطرطعان ام لا؟ وهل تؤيدون ان تكون بمتناول الاطفال ام بيد الطرطعان ام بيد الكبار؟




خلاقين


× صوره من غير تحيه لكل دعله بتشتري ملابس العيد وابلشت خلق الله بالخلاقين والحوسه ..
× صوره من غير تحيه لكل مصمم لبناني نصاب صمم شلحه وجدع فوقها قطعة شيفون مشقوق ولزخ اربع اصفار على بطاقة السعر بزعم انه الموضه ..
× صوره من غير تحيه لكل ولي أمر ترك بناته يسعسون بهالاسواق بدون مرافق ..


الحين العيد وش فيه ؟ هل العيد يستاهل الوحده تشتري فيه ثلاث فساتين وكم تنوره على برمودا على جينز؟ وهل يستوجب يكون لكل فستان جزمه وشنطه واكسسوارات وبكل خاصه <== ياقدمك بكل اجل ؟ وهل يجب ان تلزم المرأه الاسواق طيلة شهر رمضان؟!!!


بعدين ليش ياأهل الخلاقين تسوون في نفسكم كذا؟ حرام عليكم ترى هذي تهلكه!
في كل العالم تلقى محلات الاقمشه فيها بايع او اثنين وكل واحد يقيس القماش بمسطره غير عندنا تلقى المحل فيه مايقل عن اربعه وكل واحد معه خرطوش حق الدفاع المدني من طوله يمتر فيه .. الفستان الواحد ياخذ 10 امتار هذا اذا كان عادي!! اما اذا بيصير مميز الله يعين حقون الدفاع المدني بيطفرون والسبب انقراض الخراطيش ..


عاد احيانا اتوقع ان بعض البنيات يستهبلون .. اي والله مدري هم مصرقعات ولا يستهبلون ! اجل فيه فستان نصه الايمن لونه برتقالي والابط فيه ورده سودا … والنصف الثاني لونه اسود والابط فيه ورده برتقالي!ههههههههههههه
ماتدري هم من جدهم ولا رايحين حفله تنكريه! الاكيد اللي يبي مشروع ناجح يفتحله مشغل ,,

عاد يقولون ان سيندي كروفورد ماتت ممصوعه على الستيج وهي تعرض ازياء خليجيه ..

عاد هالايام اشوف بنياتنا قاموا يقلدون اخواتنا بلبنان ومصر .. مسكينات ماتلقى عندهم الا فستان واحد .. شوفوا الفقر اللي هم فيه وشلون ضيقه عليهم من حقات العام .. وشوفوا شلون ملابسهم من كثر الغسيل اكمامها مشمره وسرهم طالع .. من جد مساكين ..



جده غير



يقولون جده غير ويقولون جده ام الرخا والشده! ويقولون ان عبدالله رشاد غنى ..

جدة ياهوى الولهان ××× فيك اتجمعوا الغزلان
ولليلاتك تشوف خلان××× وثالثهم قمرنشوان


وفي لحظه جامحه استليت قلمي من غمده وهممت بالرد على ابن رشاد ..

خلوها خلوها .. ياواد ياعبادي وخر وخر ..فقلت ..

جده ياهوى الزهقان ××× فيها اتجمعوا الغربان
وبكورنيشها تشوف فيران×××وثالثهم حجه تبيع طرطعان


بيجيني واحد الحين بيقول انت متحامل على جده بقوله معليش مافي احد بيتحامل على نفسه! انا عشت بجده تسع سنين واعتبر من اهلها ومثل ماقال المثل اهل مكه ادرى بشعابها ..


يقولون جده غير واقول فعلا جده غير!

في جده تلقى متخلفين هايتين بالشوارع يروعون سكانها ويهددون امنهم! في جده تشوف العشوائيه بمعناها الصحيح! تخطيط سيء واحياء شعبيه عشوائيه مليئه بالمتخلفين! في جده لا تستغرب تشوف مطعم جنبه ورشه وجنب الورشه خياط وجنب الخياط محل يبيع معسل! في جده ماتلقى شارع سليم! في جده تولد الحامل بالشهر السابع عادي من التنقيز! في جده ينكسر عليك جنط سياره بمبلغ وقدره عادي! في جده تنتظر عند اشاره 45 دقيقه عادي ! في جده تطفح المجاري عادي! في جده الاوبئه زي السلام عليكم واخرتها حمى الضنك!
على طاري حمى الضنك يقولون صرفوا 4 مليار ريال حسب جريدة عكاظ لمكافحة المرض!! وش هالرقم الخيالي والله لو عطوا كل بعوضه ريال وقالوا لها توكلي على الله ولا كانوا اعلنوا لهالحجات اللي تارسين الشوارع لو جبتم كل 10 بعوضات بنعطيكم ريال والله ماكلفهم ربع هالمبلغ !!
وغير هذا الكثير الكثير!!


باذن الله هالعيد معيده بجده.. طيب يقولون ان جده مدينه سياحيه بل انها واجهه سياحيه للملكه .. طيب حلو خلونا نشوف هالسياحه!


الحين نبي نركب طياره نروح لجده.. صحيح ان الناس مايلقون حجز في الخطوط السعوديه الا بالواسطه .. لكن ما اعتقد انهم يجبرونك تروح معهم ؟؟!!
رح مع غيرهم !!! ويكفينا ان الكابتن يطلع لنا بعد كل رحله ويقول اشكركم على اختيار الخطوط السعوديه!!

تنزل من الطياره تركب باص!! لعنبوا ابليس المطار الوحيد في العالم اللي يركبك باص عقب الطياره!!

تدخل مطار اقل مايقال عنه علبة ساردين واطيتها شاحنه بسبعه وسبعين كفر .. زحمه وضيق وعالم مفترشه وتاخير!!

تخرج من المطار تلقى بانتظارك نصاب عفوا سواق ليموزين ياخذ على مشوار العشرة ريال مية ريال!!

اسعار السكن ببلاش!! وش ببلاش ياخي أي واحد راتبه 15 الف يقدر يحجز له غرفه في أي فندق لمدة اسبوع بالراحه !!

طيب تبي تتمشى في هالمدينه السياحيه .. طيب على فين رايحين؟ على كورنيش جده رايحين!

يقولون كورنيش جده اطول كورنيش ويمتد طوله 34 كم !! يالله لهالدرجه حنا مغفلين ولا هم يستغفلونا! ولو حسبنا المسافه المفتوحه من الكورنيش يالله يالله وعقب مانضحك على انفسنا تطلع 3 كم!!

طيب ال 3 كم هذي هل الخدمات متوفره والمكان مناسب؟!

^
^
يابريء انت .. كورنيش يتكون فقط من رصيف يفصل مباشره بين البحر والشارع!ارصفته وصخه وكله قزاز مكسر وانواع الفيران اللي تمزح معك وهالرصيف فيه ناس تجلس وناس تمشي وناس تبيع ودبابات تمشي! والطامه الكبرى ان هالمنطقه عليها زحمه غير طبيعيه من المغلوب على امرهم لدرجة ان بينك وبين خويك وانتم على فرشه وحده تجيك عايله وتجلس بينكم ..


طيب وباقي ال34 كم وين راح؟! الباقي ياطويل العمر طااار انباع للتجار .. طيب بيجيني واحد ويقول التجار ماقصروا وسووا متنزهات!
بقوله طيب ياحبيب قلبي خلنا نحسب عشاء عائله وحده وسهرتهم ولنقل عدد افرادها سته فقط .. هذا عشاهم يكلف 500 ريال فقط في المتنزه الاعتيادي! قيس على هذا المتنزهات الفخمه!

تبي تركب مركب يتسع لعشره اشخاص ومن اسوأ مايكون .. ادفع 400 مقابل ساعه وحده!!
وقيس على هذا بقية الامور! بالعربي تبي تستانس ادفع واللي مامعوش مايلزموش!

ويلومون الناس اذا هجوا لبرا! وعاشت السياحه الداخليه!


السنه الماضيه عيد الفطر ايضا كان بجده.. بحسن نيه مني او بالاصح غباء شديد ذهبت للكورنيش حتى اشوف فرحة العيد بوجوه الناس وعلقت في الزحمه 3 ساعات هذا كله علشان يشوفون الالعاب الناريه!! وغلابه يا اهل جده غلابه!!


يقولون اللي في جده سياحه وانا اقول اللي بجده صياااعه! وانا اوجه دعوه لاي شخص يمر أي شاليه ويتفرج !
فعلا .. في جده تعلمت الصياااعه !!! وصدق من قال جده غير!!!

في مره وحنا راجعين من احد شاليهات جده ومعنا واحد من الرياض يسوق فينا وماتعود على هالمناظر ومبسوووط.. كان قدامنا تريلا .. تعرفون راعين التريلات الله يرجهم يحطون الف لمبه .. يوم قربنا منها التفت علينا خوينا راعي الرياض وقال وش تبون بيبسي ولا ميرندا! يحسب التريلا محطه وستر ربك ان الشباب كلهم قالوا لأ ..

<=== اقول لعد تقول نكت اخوياك لانها ماصله

=====> ابشروا ما طلبتوا شيء

تدرون وين المشكله اني لازم اروح اعيد في جده


وبامناسبه ابشركم ان العيد ان شاء الله بعد رمضان مبااشره

<==== اقول ورا ما تشيل قرنبعك وتسري احسن

====> موضوعي وعلى كيفي اكتب

خاتمه ..

كل عام وانتم بخير وعساكم من عواده ,,


برااايفت ...

ما نبي ردود مشكور ويعطيك العافيه لا هنتم

^
^
^
اتوقع وااضحه

م
ن
ق
و
ل
تحيااتي

اقتباس من مشاركة المزاجي مشكورة اختي والله يعطيك العافيه كل عام وانتي بخير تحياتي

اقتباس من مشاركة اشتاقلها*... جدة ياهوى الولهان ××× فيك اتجمعوا الغزلان ولليلاتك تشوف خلان××× وثالثهم قمرنشوان اذا لعب الهلال فخبروني ×× فان الفن منبعه الهلالِ ههههههه والله خطيييييييييييرة واحلى شي الاشعار جدة والهلال آآآآآآآه يا عيد <<<بالغصب ذكريات وقصص <<< مضيعة معليش...:) مشكوووووووووووورة طيف عسولة ودمت لنا:)

اقتباس من مشاركة معاند جروحه ؛؛ مـشــكــوٍرٍهـ .. طيــف .. وكــل عــآمـ .. وآنــتــيـ .. بـآآلــف ... صحــه .. وعــآفيــه ؛؛

اقتباس من مشاركة الحلم الوردي يعطيك العافيه طيووووفه وكل عام وانتي بخير وصحة وسلااااامة

اقتباس من مشاركة مكانه الخالي مشكورة اختي طيوفه و كــل عــام وأنــتــي بــألـــف خــيــر ويعطيك العافيه ومشكورة وتحياتي لك مكانه الخالي

العفو ,,,
اسعدني مرورك ,,,
وانت بخير وصحة وسلامه ...

اقتباس من مشاركة اسير الشوق [FRAME="13 70"]مشكور أختي على الموضوع الأكثر من رائع[/FRAME]

العفو ,,,
الاروع مرورك أخي الكريم ,,,
يعطيك العافيه ...