اسمعيني يالفتاة اللي تسميني معاق
هذي أكبر كذبة روّجها وصدّقها الجميع
المعاق اللي حياته كلها جهل ونفاق
في زمان الوجبه السريعه والحب السريع
مو صحيح ان اللي يلمع دايما يطلع ذهب
ومو صحيح ان الكذب ينفع .. لأن حبله قصير
دام عقلي ما ذهب .. عادي إذا جسمي ذهب
انا مو زعلان .. أملك أغلا شي .. أملك ضمير
المعاق اللي عجز عن الصراحة والأمانة
حتى لو يظهر أمام الناس في شكل الكمال
شنهو يعيب الرجل إذا الجسم مرض وخانه ؟
المظاهر ماهي تأسس ولا تصنع رجال
منهو يقدر يزعم انه ما يعاني من زمانه ؟
منهو ما يهرب من الواقع إلى أرض الخيال ؟
مادمنا في الآخر نفارق هالحياة ...
انا أشوف ان المصايب كلها ممكن تهون ..
لما عطى ربي جميع الكائنات أقدارها
وعطى النباتات الفواكه والغصون
وأهدى للعصفور منقار وجناح
عطى البشر أقدارهم .. ووزع الأجسام عالأرواح ..
وأنا نصيبي كان هذا الجسم .. وراضي بالنصيب
أنا نصيبي كان روح مغلفه بالحب .. وجسم يعاني من بعض الجراح
يمكن لأن الله عرف اني بحاجة للجراح
ويمكن عشان أورّي الناس الصبر
وان المشاكل ما تحطمنا ولكنها تعلّمنا الكفاح
ما أدري ليش الله وضع روحي بهالجسم العطيب
بس أدري ان هذا النصيب
لولا وجود المآسي ما تعلمنا
هذي المشاكل دروس تزيدنا حكمة
وانا مسامح جميع اللي يعيروني
ما دام ربي قسم راضي بهالقسمه
..
شعر ماجد الخالدي
2007
النمط المتتابع
